شوق سااااااااااااكت

حليل ايامنا ديـــك ورفقة الاحباب
حليل الكدرو داك وجلسة عبيراً هاب
حليل النيل حدانا ونشرب طربنا شراب
ايام كيف عوداها بعد الرويس ماشاب

حليل ايام وليالى قضيناها سمر وايناس
حليله المابتقول الشينه طيبه وفوق الناس
جـــار الزمان بى فعلو سوا الظروف متراس
ربــــى لـــيك الشكــــوى ترفع تكف الباس

شوقاً فى يحرق يغرز فى حشاى نشابو
حد مانقول فرج تالـــنـــا يقفـــل بـــابـــو
فرقنا الزمن بـــى وجعــة ظـــروف اتعابو
صرنا زى غراقا فى عز الدمــــيره يشابو

مليناها البلد ومسخت علينا اركانا
بارحـــناهـــــا الديار ب دواعى احزانا
ان كان للمراد افرش لك قليبى مكـانه
حليله لهفة شوقك ي ال للقليب ريحانه

ياحليل اياماً فى جوارك والظروف سامحانا
ياحليل شفق المغارب وكتين الوداد ضمانا
ياحليل جلسات سمر الروعه بى امـــعانا
كيف تعود لى تانى واحكام القدر شامعانا

حليلك وتانى كيف نحقق الاحلام
اقداراً فى الوشى وقفت كما الضرغام
احكام الســـنين ضاربه فينا ســـــهام
جرعــــتنا الحناضل ومر الدبيب السام


فارقناها مجبورين وحكم القوى الجبار
رحلت شالت من حشاى فرحة النوار
بيــوت احــــلام فــــى جوانا كانت دار
صبحت بى فراقنا مسكن خراب ودمار

مدينا الصبر حبلاً يفوت اوجاعى
تربسناهو العشق امنتو بى ايداعــى
فى الله العشم يكفف سيول دماعــى
والصابرات روابح وفى الله كل اطماعى

وعيتو الغشيم يفوت دروب الريده
ويرضى بالمقسومه يعلن سجن تابيده
مخلوق للوجع واحزان السنين ترديده
اتيقن المغلوب والامو الزمــان تفنيده


الصابرات روابح وال من الله مابتنفات
دردنا الزمـــــان هاجــــت على نايبات
فراق النايره طبق فى حشاى اهات
ورثنى المراير ونوح فاقد العزيز المات